"მანჩესტერ სიტის" მთავარმა მწვრთნელმა, რობერტო მანჩინიმ, განაცხადა, რომ ფორვარდები ედინ ძეკო და კარლოს ტევესი გუნდში რჩებიან.
ორივე ფეხბურთელს ჭორები ისეთ გუნდებში აგზავნიდნენ, როგორებიც არიან "ბაიერნი" და "მილანი." ძეკომ ინგლისის გასულ ჩემპიონატში მოასწრო, როგორც ძირითადში ადგილის მოპოვება, ისე - დაკარგვა, ხოლო ტევესმა მთავარ მწვრთნელთან ურთიერთობა გაიფუჭა და რამდენიმე თვის წინ არგენტინაშიც კი იმყოფებოდა. მიუხედავად ამისა, იგი ძალიან დაეხმარა თავის გუნდს ჩემპიონატის ბოლოში,ხოლო ძეკომ გასულ სეზონში 19 გოლის გატანა მოახერხა.
"ძეკოც და ტევესიც რჩებიან. ჩვენ შესანიშნავი გუნდი ვართ და ყველა წამყვანი ფეხბურთელის შენარჩუნებას შევეცდებით. ეს არ არის მარტივი, თუმცა, ისინი არსად არ მიდიან."
"ჩვენ ისევ არ გვყოფნის რამდენიმე ფეხბურთელი იმისთვის, რომ "ბარსელონასა" და "რეალის" დონეს მივაღწიოთ. გარდა ამისა, იმისკენ მივისწრაფვით, რომ წლიდან წლამდე საკუთარი თამაში გავაუმჯობესოთ"- განაცხადა იტალიელმა სპეციალისტმა.
მანჩინიმ რუსეთის საფეხბურთო სტრუქტურის დაინტერესება მის ნაკრების მთავარ მწვრთნელად დანიშვნის შესახებ არ უარყო. "მოხარული ვარ ამ ინტერესით ჩემდამი, მაგრამ "მანჩესტერ სიტიში" მომავალზე მნიშვნელოვანი გეგმები მაქვს."
მან, ასევე, გამოთქვა საკუთარი მოსაზრება იმის შესახებ, რომ მარიო ბალოტელის შეუძლია მიაღწიოს ლიონელ მესის, ანდრეს ინიესტას და კრიშტიანუ რონალდუს დონეს.
"მარიო საკუთარი თავის მიმართ შესანიშნავი ნიჭის გამო მადლიერი უნდა იყოს. მას არა აქვს უფლება გაფლანგოს ის არასპორტული მიზეზების გამო. ბალოტელისთვის შემდეგი სეზონი უნდა გახდეს განმსაზღვრელი. მესი, კრიშტიანუ რონალდუ და ინიესტა ყოველ დღე ბევრს მუშაობენ, რათა მაღალი დონე შეინარჩუნონ და მარიოს ასეთივე დონის მიღწევა შეუძლია"- განაცხადა რობერტო მანჩინი.
